Maharashtra Farmer Loan Waiver 2026 | राज्यात सध्या अर्थसंकल्पीय अधिवेशनाचे वारे वाहू लागले आहेत. या अधिवेशनात सरकार आपल्यासाठी काय खास आणणार, याकडे सर्वच सामान्यांचे डोळे लागलेले असतात. मात्र, यंदाच्या बजेटमध्ये सर्वात जास्त चर्चा आहे ती म्हणजे शेतकरी कर्जमाफीची. गेल्या काही काळापासून निसर्गाची अवकृपा, पिकांना न मिळणारा योग्य भाव आणि वाढता खर्च यामुळे राज्यातील बळीराजा पार कोलमडून गेला आहे. अशा परिस्थितीत सरकारकडून कर्जमाफीचे ‘कवच’ मिळेल, अशी आशा प्रत्येक शेतकऱ्याला लागून राहिली होती. याच विषयावर आता राज्याचे मंत्री चंद्रकांत पाटील यांनी एक अत्यंत मोठे आणि महत्त्वाचे विधान केले आहे, ज्यामुळे शेतकऱ्यांमध्ये एकाच वेळी दिलासा आणि काहीशी धाकधूक निर्माण झाली आहे.
कुलस्वामिनी आई तुळजाभवानीच्या दर्शनासाठी चंद्रकांत पाटील तुळजापुरात आले होते. यावेळी माध्यमांशी बोलताना त्यांनी कर्जमाफीबाबत सरकारची भूमिका स्पष्ट केली. पाटील म्हणाले की, राज्य सरकार शेतकऱ्यांच्या कर्जमाफीबाबत पूर्णपणे सकारात्मक आहे आणि त्या दिशेने वेगाने हालचाली सुरू आहेत. बच्चू कडू यांनी केलेल्या आंदोलनानंतर सरकारने हा विषय अत्यंत गांभीर्याने हाती घेतला आहे. सध्या राज्यभरातील पात्र शेतकऱ्यांची आकडेवारी गोळा करण्याचे काम युद्धपातळीवर सुरू आहे. सरकार कर्जमाफी देणार हे आता जवळपास निश्चित मानले जात आहे, मात्र त्यासाठी थोडी प्रतीक्षा करावी लागणार आहे.
आगामी अर्थसंकल्पीय अधिवेशनातच ही घोषणा होईल अशी सर्वांना अपेक्षा होती, पण पाटील यांनी येथेच एक ‘ट्विस्ट’ आणला आहे. काही तांत्रिक कारणांमुळे आणि नियमांच्या मर्यादेमुळे या अधिवेशनात कर्जमाफीची अधिकृत घोषणा करणे शक्य नसल्याचे त्यांनी स्पष्ट केले. याचा अर्थ असा की, जरी सरकारची मानसिकता कर्जमाफी देण्याची असली, तरी बजेटच्या कागदावर ती लगेच उमटणार नाही. या बातमीमुळे शेतकऱ्यांच्या पदरी काहीशी प्रतीक्षा पडली असली तरी, प्रकिया सुरू असल्याने आशा मात्र कायम आहेत.
विशेषतः धाराशिव जिल्ह्यातील शेतकऱ्यांसाठी चंद्रकांत पाटील यांनी सकारात्मक शब्द वापरल्याने तिथल्या शेतकऱ्यांमध्ये आनंदाचे वातावरण आहे. थोडक्यात सांगायचे तर, कर्जमाफीचा मार्ग मोकळा झाला आहे, पण त्याचे अधिकृत शिक्कामोर्तब होण्यासाठी अर्थसंकल्पीय अधिवेशन संपल्यानंतरच्या काळाची वाट पाहावी लागणार आहे. बळीराजासाठी हा निर्णय नक्कीच जीवदान देणारा ठरेल, पण तो प्रत्यक्ष कधी लागू होतो, हे पाहणे आता महत्त्वाचे ठरणार आहे.