Unseasonal Rain in Maharashtra | महाराष्ट्रात सध्या उन्हाचा चटका चांगलाच जाणवू लागला आहे. दुपारच्या वेळी अंगाची लाहीलाही होत असतानाच आता निसर्गाने आपली चाल बदलली आहे. उन्हाच्या कडाक्यानंतर आता राज्यात अवकाळी पावसाचे सावट निर्माण झाले असून, हवामान विभागाने (IMD) दिलेल्या अंदाजाने सर्वांचीच झोप उडवली आहे. सोमवारी आणि मंगळवारी राज्यातील काही भागांत विजांच्या कडकडाटासह हलक्या ते मध्यम स्वरूपाच्या पावसाची शक्यता वर्तवण्यात आली आहे.
गेल्या काही दिवसांपासून तापमानात मोठी चढ-उतार पाहायला मिळत आहे. अरबी समुद्र आणि बंगालच्या उपसागरातून येणाऱ्या ओलाव्यामुळे वातावरणात अचानक बदल झाला असून, स्थानिक पातळीवर वाढलेल्या उष्णतेमुळे ढगांची निर्मिती होत आहे. याचाच परिणाम म्हणून आता राज्यावर पावसाचे ढग जमा झाले आहेत.
या जिल्ह्यांत पावसाची हजेरी
सोमवारी अहिल्यानगर, सांगली, सोलापूर, बीड, लातूर आणि धाराशिव या जिल्ह्यांत ढगाळ वातावरण राहणार आहे. तर मंगळवारी पावसाचा जोर काहीसा वाढू शकतो. मंगळवारी सोलापूर, परभणी, हिंगोली, नांदेड, लातूर, धाराशिवसह विदर्भातील चंद्रपूर आणि गडचिरोली जिल्ह्यांत विजांच्या कडकडाटासह पावसाच्या सरी कोसळण्याची शक्यता आहे. एकूण ११ जिल्ह्यांना सतर्क राहण्याचे आवाहन करण्यात आले आहे.
शेतकऱ्यांच्या डोळ्यात पाणी
शुक्रवारी नाशिक आणि नंदुरबारमध्ये झालेल्या अवकाळी पावसाने आधीच पिकांचे मोठे नुकसान केले आहे. सध्या शेतात कांदा, गहू आणि इतर रब्बी पिकांची काढणी अंतिम टप्प्यात आहे. अशावेळी अचानक येणारा पाऊस हा शेतकऱ्यांच्या हातातोंडाशी आलेला घास हिरावून नेणारा ठरू शकतो. काढणीला आलेलं पीक भिजलं तर शेतकऱ्यांचे मोठे आर्थिक नुकसान होणार आहे.
काय काळजी घ्याल?
हवामान तज्ज्ञांनी शेतकऱ्यांना मोलाचा सल्ला दिला आहे. जर तुमची पिके काढून तयार असतील, तर ती सुरक्षित ठिकाणी हलवा किंवा ताडपत्रीने झाकून ठेवा. हवामानातील हा बदल केवळ शेतीपुरता मर्यादित नसून, यामुळे वीजपुरवठा खंडित होणे किंवा वाहतुकीवर परिणाम होण्याचेही संकेत आहेत.