State Bank of India news: सध्या सोशल मीडियावर आणि काही वेबसाईटवर मुलगी असेल तर State Bank of India १ मिनिटात १५ लाख रुपये खात्यात जमा करतो” अशा मथळ्यांच्या बातम्या मोठ्या प्रमाणावर फिरत आहेत. मात्र या दाव्यांमागचं खरं वास्तव काय आहे, हे समजून घेणं गरजेचं आहे. कारण ही योजना थेट मोफत पैसे देणारी नसून, दीर्घकालीन गुंतवणुकीवर आधारित सरकारी बचत योजना आहे.
State Bank of India मार्फत चालवली जाणारी सुकन्या समृद्धी योजना ही केंद्र सरकारची ‘बेटी बचाओ, बेटी पढाओ’ अभियानाअंतर्गत सुरू करण्यात आलेली योजना आहे. या योजनेचा उद्देश मुलींच्या भविष्यासाठी विशेषतः शिक्षण आणि विवाहासाठी सुरक्षित, हमखास आणि करसवलतीसह बचत निर्माण करून देणं हा आहे.
या योजनेत मुलीचं वय १० वर्षांखाली असणं आवश्यक आहे. खाते उघडल्यानंतर सलग १५ वर्षांपर्यंत पालकांनी गुंतवणूक करावी लागते आणि खात्याची एकूण मुदत २१ वर्षांची असते. सध्या या योजनेवर सुमारे ८.२ टक्के वार्षिक चक्रवाढ व्याज दिलं जात आहे, जे इतर अनेक बचत योजनांच्या तुलनेत जास्त मानलं जातं. State Bank of India news
खात्यात दरवर्षी किमान २५० रुपये आणि कमाल १.५ लाख रुपयांपर्यंत गुंतवणूक करता येते. नियमित आणि शिस्तबद्ध गुंतवणूक केल्यास मोठी रक्कम तयार होते. उदाहरणार्थ, जर एखाद्या पालकाने दरवर्षी सुमारे ३५ हजार रुपये म्हणजेच महिन्याला साधारण २ ते ३ हजार रुपयांची बचत केली, तर २१ वर्षांनंतर त्या खात्यातून सुमारे १५ ते १६ लाख रुपयांची रक्कम मिळू शकते. तर ज्यांनी दरवर्षी जास्तीत जास्त १.५ लाख रुपयांची गुंतवणूक केली, त्यांना मुदतपूर्तीवर ७० लाखांहून अधिक रक्कम मिळू शकते.
मात्र इथे एक महत्त्वाची गोष्ट लक्षात घ्यावी लागते हे पैसे लगेच किंवा १ मिनिटात खात्यात जमा होत नाहीत. बँक किंवा सरकार कोणालाही थेट मोफत १५ लाख रुपये देत नाही. ही संपूर्ण योजना बचत आणि व्याजावर आधारित आहे. त्यामुळे सोशल मीडियावर दिसणाऱ्या १ मिनिटात १५ लाख अशा जाहिराती या अनेकदा दिशाभूल करणाऱ्या किंवा क्लिकबेट स्वरूपाच्या असतात.
या योजनेचा आणखी एक फायदा म्हणजे मुलगी १८ वर्षांची झाल्यानंतर शिक्षणासाठी खात्यातील ५० टक्के रक्कम काढण्याची परवानगी दिली जाते. तसेच संपूर्ण गुंतवणूक आणि मिळणारी रक्कम आयकरमुक्त असून, आयकर कायद्याच्या ८०C कलमाअंतर्गत करसवलतही मिळते.
सुकन्या समृद्धी योजनेचं खाते उघडण्यासाठी जवळच्या SBI शाखेत जावं लागतं. यासाठी मुलीचा जन्म दाखला, पालकांचे आधार व पॅन कार्ड, फोटो आणि निवासाचा पुरावा आवश्यक असतो.
एकंदरीत पाहता, सुकन्या समृद्धी योजना ही कोणतीही तात्काळ पैसे देणारी योजना नसून, भविष्यासाठी मजबूत आर्थिक आधार तयार करून देणारी सरकारी बचत योजना आहे. थोडीथोडी नियमित बचत केल्यास मुलीच्या शिक्षण आणि लग्नासाठी मोठा निधी उभा करता येतो. त्यामुळे फेक दाव्यांवर विश्वास न ठेवता, योग्य माहिती घेऊनच निर्णय घेणं महत्त्वाचं आहे.
Arjunpatil