Ladki Bahin Yojana : राज्यातील लाखो महिलांसाठी मोठी दिलासादायक बातमी समोर आली आहे. जानेवारी 2026 च्या हप्त्याची आतुरतेने वाट पाहणाऱ्या ‘लाडक्या बहिणीं’साठी सरकारने अखेर मोठं पाऊल उचललं आहे. मुख्यमंत्री माझी लाडकी बहीण योजनेअंतर्गत जानेवारी महिन्याचे 1500 रुपये लवकरच लाभार्थी महिलांच्या खात्यात जमा होण्याची शक्यता निर्माण झाली आहे. यासंदर्भात शासन निर्णयही जारी करण्यात आला असून निधी वर्ग करण्याची प्रक्रिया सुरू झाली आहे.
महायुती सरकारच्या कार्यकाळात गेमचेंजर ठरलेल्या मुख्यमंत्री माझी लाडकी बहीण योजना या योजनेमुळे राज्यातील कोट्यवधी महिलांना थेट आर्थिक आधार मिळत आहे. घरखर्च, मुलांचं शिक्षण, औषधोपचार किंवा छोट्या व्यवसायासाठी ही रक्कम उपयोगी पडत असल्याने अनेक कुटुंबांना दिलासा मिळाला आहे. त्यामुळे प्रत्येक महिन्याचा हप्ता कधी जमा होणार, याकडे महिलांचं लक्ष लागलेलं असतं.
98.45 कोटींचा निधी वर्ग
जानेवारी महिन्याच्या हप्त्याच्या वितरणासाठी सामाजिक न्याय विभागाने तब्बल 98.45 कोटी रुपयांचा निधी महिला व बाल विकास विभागाकडे वर्ग केला आहे. 18 फेब्रुवारी रोजी यासंदर्भातील शासन निर्णय जारी करण्यात आला. यापूर्वीही विविध महिन्यांच्या हप्त्यासाठी अशाच पद्धतीने निधी वर्ग करण्यात आला होता. आता निधी उपलब्ध झाल्यामुळे जानेवारीचा हप्ता लवकरच खात्यात जमा होईल, अशी अपेक्षा व्यक्त केली जात आहे.
हप्त्यांचा मागील पॅटर्न काय सांगतो?
नोव्हेंबर महिन्याचा हप्ता डिसेंबर 2025 च्या शेवटच्या आठवड्यात आणि जानेवारी 2026 च्या सुरुवातीला जमा करण्यात आला होता. त्यानंतर डिसेंबर महिन्याचा हप्ता 14 जानेवारीच्या सुमारास महिलांच्या खात्यात वर्ग करण्यात आला. याच पद्धतीनुसार पाहता, जानेवारीचा हप्ता देखील येत्या काही दिवसांत जमा होण्याची शक्यता वर्तवली जात आहे. त्यामुळे महिलांनी बँक खात्यांवर लक्ष ठेवण्याचे आवाहन करण्यात येत आहे.
कोणाला किती रक्कम मिळते?
या योजनेअंतर्गत पात्र महिलांना दरमहा 1500 रुपये दिले जातात. मात्र ज्या महिलांना PM Kisan Samman Nidhi आणि Namo Shetkari Mahasamman Nidhi Yojana या योजनांचा लाभ मिळतो, त्यांना लाडकी बहीण योजनेतून दरमहा 500 रुपये दिले जातात. म्हणजेच इतर शासकीय लाभ लक्षात घेऊन रक्कम निश्चित केली जाते. Ladki Bahin Yojana
लाभार्थी संख्येत घट का?
जुलै 2024 मध्ये योजना सुरू झाली तेव्हा लाभार्थी महिलांची संख्या तब्बल 2 कोटी 46 लाख इतकी होती. मात्र त्यापैकी केवळ 1 कोटी 90 लाख महिलांनी ई-केवायसी प्रक्रिया पूर्ण केली. सुमारे 55 लाख महिलांनी अद्याप ई-केवायसी केलेली नाही. परिणामी डिसेंबर महिन्याचा हप्ता फक्त 1 कोटी 60 लाख महिलांनाच मिळाला. सरकारने ई-केवायसी पूर्ण करण्यासाठी 31 मार्च 2026 पर्यंत मुदतवाढ दिली आहे. त्यामुळे ज्यांनी अद्याप केवायसी केली नाही, त्यांनी तातडीने प्रक्रिया पूर्ण करणे आवश्यक आहे. अन्यथा पुढील हप्ते अडचणीत येऊ शकतात.
महिलांसाठी मोठा आधार
महागाईच्या काळात दरमहा मिळणारे 1500 रुपये अनेक कुटुंबांसाठी मोठा हातभार ठरत आहेत. ग्रामीण भागातील महिलांना या रकमेचा उपयोग शेतीकामासाठी, बचत गटासाठी किंवा घरगुती व्यवसायासाठी करता येतो. त्यामुळे ही योजना केवळ आर्थिक मदत नसून महिलांच्या सक्षमीकरणाचं एक प्रभावी साधन ठरत आहे.
आता 98.45 कोटींचा निधी वर्ग झाल्यामुळे जानेवारीच्या हप्त्याची प्रतीक्षा लवकरच संपण्याची चिन्हं दिसत आहेत. लाभार्थी महिलांनी बँक खात्याची स्थिती तपासत राहावी आणि ई-केवायसी प्रक्रिया पूर्ण करून पुढील हप्ते वेळेवर मिळवावेत, असे आवाहन प्रशासनाकडून करण्यात येत आहे. लाडक्या बहिणींसाठी ही खरोखरच दिलासादायक बातमी ठरली आहे.